Weather Update : నాలుగు రోజులు వర్షాలు తప్పవట.. అదే సమయంలో ఎండల తీవ్రత కూడా?

ఈరోజు ఉత్తరాంధ్ర జిల్లాలైన శ్రీకాకుళం, విజయనగరం, పార్వతీపురం మన్యం, విశాఖపట్నం, అల్లూరి సీతారామరాజు, అనకాపల్లి, కాకినాడ జిల్లాల్లో పిడుగులతో కూడిన వర్షం పడుతుందని, మోస్తరు వర్షం కురిసే అవకాశముందని హెచ్చరించింది. మిగిలిన జిల్లాల్లో మాత్రం నేడు తేలికపాటి వర్షాలతో పాటు పిడుగులు పడతాయని హెచ్చరికలు జారీ చేసింది. పశువుల కాపర్లు, రైతులు పొలాల్లో చెట్ల కిందకు వెళ్లకుండా తగిన జాగ్రత్తలు తీసుకోవాలని సూచించింది. రానున్న నాలుగు రోజులు ఇదే పరిస్థితి కొనసాగుతుందని కూడా తెలిపింది. అదే సమయంలో కొన్ని జిల్లాల్లో పగటి పూట ఉష్ణోగ్రతలు భారీగా నమోదవుతాయని, నలభై డిగ్రీల ఉష్ణోగ్రతలు దాటే అవకాశముందని కూడా విపత్తు నిర్వహణ సంస్థ తెలిపింది.

ఇక తెలంగాణలో నేడు కూడా అనేక ప్రాంతాల్లో వర్షాలు పడే అవకాశముందని తెలిపింది. దీంతో పాటు బలమైన ఈదురుగాలులు వీస్తాయని, గంటకు ముప్ఫయి నుంచి నలభై కిలోమీటర్ల వేగంతో ఈదురుగాలులు కూడా వీచే అవకాశముందని వాతావరణ శాఖ తెలిపింది. ప్రధానంగా మహబూబ్ నగర్, నల్లగొండ, ఖమ్మం, వరంగల్, హైదరాబాద్, రంగారెడ్డి పాత జిల్లాల్లో వర్షం పడే అవకాశముందని తెలిపింది. కానీ మిగిలిన ఆదిలాబాద్, నిజామాబాద్, కరీంనగర్, మెదక్ జిల్లాల్లో పగటి ఉష్ణోగ్రతలు భారీగా పెరిగే అవకాశముందని, నేడు 43 డిగ్రీల ఉష్ణోగ్రతలు దాటి మరింత పెరిగే అవకాశముందని, సాధారణ ఉష్ణోగ్రతలు కంటే ఈ జిల్లాల్లో ఉష్ణోగ్రతలు పగటి వేళల్లో పెరుగుతాయని హైదరాబాద్ వాతావరణ శాఖ పేర్కొంది.