ఆళ్ల నాని… మాజీ మంత్రి, మాజీ వైసీపీ నాయకులు. ప్రస్తుతం తెలుగుదేశం పార్టీలో ఉన్నారు. అయితే ఆయన ఇప్పుడు ఏం చేస్తున్నారు? ఎలా ముందుకు వెళ్తున్నారు? అనేది ఆసక్తిగా మారింది. గెలిచిన నాయకులే కాదు, ఓడిన నాయకుల పనితీరుపై కూడా ఇటీవల కొన్ని సర్వేలు వచ్చాయి. ఇలాంటి వారిలో సౌమ్యుడుగా పేరుందిన నాని పరిస్థితిపై కూడా కొన్ని సర్వే సంస్థలు నివేదికలు ఇచ్చాయి. వీటి ప్రకారం ఆళ్ల నాని పరిస్థితి ఇప్పుడు ఎట్లా ఉంది అంటే ఆయన టిడిపిలో చేరినా, టిడిపి తరఫున బయటకు రాలేకపోతున్నారు.
టిడిపి జెండా పట్టుకొని ప్రజల్లోకి తిరగలేకపోతున్నారు. టిడిపి తరఫున ఒక కార్యక్రమాన్ని కూడా నిర్వహించలేని పరిస్థితిలో ఉన్నారు. గతంలో సుదీర్ఘకాలం రాజకీయంగా.. టిడిపికి ఆయనకు మధ్య ఉన్న విభేదాలు ఇప్పటికీ అంతర్గతంగా కొనసాగుతూనే ఉన్నాయ‌ని అంటున్నారు. ఆయన టిడిపిలో చేరడానికి ముందు కొందరు నాయకులు ఆయనను వ్యతిరేకించిన విషయం తెలిసిందే. అయినప్పటికీ చంద్రబాబు ఆయనను స్వాగతించారు. అయితే ఇప్పుడు ఆ పరిస్థితి కనిపించడం లేదు. నాయకులు సర్దుకుపోతారని చంద్రబాబు అనుకున్నా క్షేత్రస్థాయిలో మాత్రం ఆ పరిస్థితి లేకుండా పోయింది.
దీనికి కారణం అంతర్గతంగా నెలకొన్న విభేదాలేనని అందరూ చెబుతున్న మాట. మరోవైపు రాజకీయంగా ఆళ్ల నాని గ్రాఫ్ కూడా తక్కువగానే ఉందని సర్వేలు తేల్చి చెప్పా యి. 2019లో విజయం దక్కించుకున్నప్పటికీ ఆయన గత ఏడాది ఎన్నికల్లో మాత్రం ఘోర పరాజయం పాలయ్యారు. వ్యక్తిగతంగా ఓటు బ్యాంకు ఉందని ఆయన అంటున్నా.. అంత లేదనేది సర్వేలు తేల్చి చెప్తున్నాయి. వ్యక్తిగతంగా ఓటు బ్యాంకు ఉంటే ఆ రేంజ్ వేరుగా ఉంటుందని, కానీ వ్యక్తిగతంగా ఓటు బ్యాంకు లేకుండా పోవడం వల్లే ఆళ్ల నాని పరిస్థితి ఇబ్బందిగా మారిందని అంటున్నారు. ఇక ప్రజలు ఏం కోరుకుంటున్నారు? అంటే ఆళ్ళ నాని విషయాన్ని పెద్దగా ఎవరూ పట్టించుకోవడం లేదనేది సర్వే పేర్కొంది.
ఈ విషయం ప్రముఖ సర్వే సంస్థ చెప్పింది కాబట్టి పుంజుకోవాల్సిన అవసరం ఉంది. అంతేకాదు ప్రజలను కలుసుకోవాల్సిన అవసరం ఉంది. ఆయన నిజంగానే టిడిపి నాయకుడిగా ఎదగాలి అనుకుంటే పథకాలను ప్రచారం చేయాలి. ప్రజల్లోకి వెళ్లాలి. పార్టీ తరఫున యాక్టివ్ గా కూడా ఉండాలి. కార్యకర్తలను ముందుండి నడిపించాలి. చేయాల్సింది చాలా ఉంది. కానీ, కండువా మార్చుకోవడం తేలిగ్గానే అయిపోయిన పార్టీ కార్యక్రమాల విషయంలో మాత్రం నాని మౌనంగా ఉంటున్నారు. తనకు ఏమీ పట్టనట్టే వ్యవహరిస్తున్నారు. ఇది ఆయన భవిష్యత్తుకు ప్రమాదకర సంకేతాలను ఇస్తుందన్నది సర్వేలు చెబుతున్న మాట. మరి దీన్ని బట్టి ఆయన పుంజుకుంటారా లేదా అనేది చూడాలి. ఇప్పటికైతే ఆళ్ల నాని పరిస్థితి ఎన్నికలకు ముందు ఏ రకంగా అయితే ఉందో ఇప్పుడు కూడా అలాగే ఉందనేది, ఆయన ఏమాత్రం పొంచుకోలేదనేది పరిశీలకులు చెబుతున్న మాట.
About the Author
