ప్రపంచంలోనే అత్యంత ప్రతిష్టాత్మకమైన అందాల పోటీల్లో ఒకటైన మిస్ వరల్డ్ 2025కి హైదరాబాద్ నగరం ఆతిథ్యం ఇస్తోంది. ఈ వేడుకకు వివిధ దేశాల నుంచి 108 మంది ముద్దుగుమ్మలు తరలివచ్చారు. శనివారం నాడు ఈ సుందరీమణులు రామోజీ ఫిల్మ్‌సిటీలో పర్యటించారు. ప్రపంచ సినీ కళా వైభవానికి నిలువెత్తు నిదర్శనమైన రామోజీ ఫిల్మ్‌సిటీలోని అద్భుతమైన సెట్టింగ్‌లు, ప్రకృతి రమణీయత వారిని ఎంతగానో ఆకట్టుకున్నాయి.
రామోజీ ఫిల్మ్‌సిటీ ప్రధాన ద్వారం వద్దకు చేరుకున్న ఈ అందాల భామలకు రామోజీ గ్రూపు సంస్థల సీఎండీ సీహెచ్‌.కిరణ్, ఫిల్మ్‌సిటీ ఎండీ విజయేశ్వరి సాదరంగా స్వాగతం పలికారు. సాంప్రదాయ భారతీయ పద్ధతిలో వారికి తిలకం దిద్ది, ముత్యాల దండలు వేసి ఆహ్వానించారు. అనంతరం వారు ఫిల్మ్‌సిటీలోని ప్రధాన ఆకర్షణలైన సితార, తార, ఏంజెల్ ఫౌంటెయిన్, హవా మహల్ వంటి ప్రదేశాలను సందర్శించారు.
ముఖ్యంగా.. ‘బాహుబలి’ సినిమా కోసం ప్రత్యేకంగా నిర్మించిన భారీ సెట్‌ను చూసి ప్రపంచ సుందరీమణులు ఆశ్చర్యపోయారు. ఆ సెట్‌లోని కళా నైపుణ్యం, దాని విశాలత్వం వారిని ఎంతగానో ముగ్ధులను చేసింది. అక్కడ వారు ఫోటోలు దిగారు. ఆ దృశ్యాలను తమ కెమెరాల్లో బంధించారు.
సాయంత్రం వేళ, మిస్ వరల్డ్ పోటీదారుల కోసం మొఘల్ గార్డెన్‌లో ప్రత్యేక విందు ఏర్పాటు చేశారు. విద్యుత్ దీపాల వెలుగులో, ఆహ్లాదకరమైన సంగీతం మధ్య వారు ఆత్మీయంగా మాట్లాడుకుంటూ విందును ఆరగించారు. అక్కడ వారు సెల్ఫీలు దిగుతూ, ఆనందంగా గడిపారు.
ఈ కార్యక్రమంలో రాచకొండ పోలీస్ కమిషనర్ సుధీర్ బాబు, ఎమ్మెల్యే మల్‌రెడ్డి రంగారెడ్డితో పాటు పలువురు ప్రముఖులు పాల్గొన్నారు. రామోజీ ఫిల్మ్‌సిటీ విశిష్టతను, దాని వ్యవస్థాపకులు రామోజీరావు విజన్ గురించి నిర్వాహకులు వారికి వివరించారు.
ఆదివారం మిస్ వరల్డ్ పోటీదారులు హైదరాబాద్‌లోని కమాండ్ కంట్రోల్ సెంటర్‌ను, రాష్ట్ర సచివాలయాన్ని సందర్శించనున్నారు. అక్కడ తెలంగాణ తల్లి విగ్రహానికి నివాళులర్పించి, ప్రభుత్వ పథకాలపై ఏర్పాటు చేసిన ప్రత్యేక ప్రదర్శనను తిలకించనున్నారు. మొత్తానికి ప్రపంచ సుందరీమణుల రామోజీ ఫిల్మ్‌సిటీ సందర్శన ఒక అద్భుతమైన అనుభవంగా మిగిలిపోయింది. సినీ ప్రపంచం వైభవాన్ని, భారతదేశ సంస్కృతిని వారు ప్రత్యక్షంగా చూసి తెలుసుకున్నారు.
About the Author
