Cease Fire : పాక్ మళ్లీ కాల్పుల విరమణ ఒప్పందాన్ని ఉల్లంఘించిందా? భారత్ సమాధానం ఎలా ఉంటుంది?

సోమవారం రాత్రి డ్రోన్లతో జరిపిన దాడులను భారత్ ఆర్మీ తిప్పికొట్టగలిగినా అసలు కాల్పుల విరమణను ఎందుకు పాటించలేదన్న కామెంట్స్ వినపడుతున్నాయి. భారత్ ను తేలిగ్గా పాక్ తీసుకుందా? లేక పాక్ ప్రభుత్వం ఆదేశాలను ఆ దేశ సైన్యం వినడం లేదా? అన్న అభిప్రాయం అంతర్జాతీయ సమాజం నుంచి వ్యక్తమవుతుంది. సాంబా సెక్టార్ లో పెద్ద శబ్దాలు వచ్చినట్లున్యూస్ ఏజెన్సీలు కూడా తెలిపాయి. రాత్రి పది గంటల సమయంలో డ్రోన్లు కనిపించాయని భారత్ ఆర్మీ కూడా ధృవీకరించింది. దీంతో పాక్ తన వక్రబుద్ధిని మార్చుకోలేదని మరోసారి రుజువు కావడంతో భారత్ ఆర్మీ నిరంతరం పహారా కాస్తుంది. సరిహద్దుల్లో మళ్లీ టెన్షన్ వాతావరణం నెలకొంది.

అయితే భారత్ సరిహద్దు ప్రాంతాల్లో ఇండిగో విమాన సర్వీసులను రద్దు చేసినట్లు ఇండిగో సంస్థ తెలిపింది. ప్రయాణికుల భద్రత దృష్ట్యా ఈ నిర్ణయం తీసుకోవాల్సి వచ్చిందని ఇండిగో సంస్థ తెలిపింది. జమ్మూ కాశ్మీర్, చండీగఢ్, లెహ్, శ్రీనగర్, రాజ్ కోట్ ప్రాంతాలకు ఈరోజు తమ విమానాల రాకపోకలను రద్దు చేస్తున్నట్లు ప్రకటించింది. అయితే సోమవారం రాత్రి పాక్ కాల్పులకు దిగడంతో దానికి దీటుగా సమాధానం చెప్పేందుకు భారత్ కూడా సిద్ధమయ్యే సూచనలు కనిపిస్తున్నాయి. ఈరోజు అత్యవసర సమావేశం నిర్వహించి తగిన నిర్ణయం తీసుకునే అవకాశముందని చెబుతున్నారు. త్రివిధ దళాధిపతులు భేటీ అయి ప్రధాని మోదీతో చర్చించిన అనంతరం తదుపరి చర్యలకు దిగే అవకాశముందని అంటున్నారు.