ఈ రోజుల్లో చాలా మంది జేబుల్లో క్రెడిట్ కార్డులు ఉండడం సర్వసాధారణం అయిపోయింది. చిన్న అవసరం వచ్చినా, ఆన్‌లైన్‌లో షాపింగ్ చేయాలన్నా, క్రెడిట్ కార్డు ఎంతగానో ఉపయోగపడుతుంది. అయితే, కొందరు స్నేహితుల మధ్య “నా కార్డ్ తీసుకో, అవసరమైతే వాడుకో” అని చెప్పేస్తుంటారు. కానీ, ఇలా చేయడం ఎంత ప్రమాదమో ఆర్థిక నిపుణులు హెచ్చరిస్తున్నారు. మీ స్నేహితుడి కోసం మీ క్రెడిట్ కార్డును ఇస్తే, మీ డబ్బు, మీ స్నేహం రెండూ చెడిపోయే ప్రమాదం ఉంది.
-స్నేహంపై ప్రభావం
“ఫ్రెండే కదా ఏం చేస్తాడు” అని అనుకోవచ్చు. కానీ కొన్నిసార్లు స్నేహం, ఆర్థిక విషయాలు కలిసినప్పుడు చాలా సమస్యలు వస్తాయి. మీ స్నేహితుడు మీ క్రెడిట్ కార్డ్‌తో ఖర్చు చేసి, బిల్లు కట్టకపోతే ఏం చేస్తారు? అడగలేక, వదిలేయలేక చాలా ఇబ్బంది పడతారు. ఇది ఇద్దరి మధ్య స్నేహాన్ని పూర్తిగా పాడు చేస్తుంది.
-మీ క్రెడిట్ స్కోర్‌కు ముప్పు
మీ స్నేహితుడు గనుక సమయానికి బిల్లు చెల్లించకపోతే, ఆ ప్రభావం నేరుగా మీ క్రెడిట్ స్కోర్‌పై పడుతుంది. క్రెడిట్ స్కోర్ తక్కువైతే, భవిష్యత్తులో మీరు బ్యాంకుల నుంచి రుణం తీసుకోవాలన్నా, కొత్త క్రెడిట్ కార్డు కావాలన్నా చాలా కష్టమవుతుంది. మీ కార్డ్‌ను మీ స్నేహితుడు వాడినా, బ్యాంకుల రికార్డుల్లో అకౌంట్ హోల్డర్ మీరే కాబట్టి, బిల్లు చెల్లించకపోయినా లేదా ఏదైనా సమస్య వచ్చినా బ్యాంకులు మీ స్నేహితుడిని అడగవు, మిమ్మల్నే విచారిస్తాయి.
– మోసాల బారిన పడే అవకాశం
మీ స్నేహితుడు నిజంగానే అమాయకుడు కావచ్చు. కానీ, ఒకవేళ మీ కార్డ్‌ను ఇంకొకరికి ఇచ్చినా, లేదా ఆన్‌లైన్‌లో సైట్‌లలో ఉపయోగిస్తున్నప్పుడు మోసగాళ్లు ఆ వివరాలను తస్కరించినా, అది మీకు పెద్ద తలనొప్పి అవుతుంది. ఒకవేళ మీ క్రెడిట్ కార్డ్‌తో ఏదైనా మోసపూరిత లావాదేవీ జరిగిందని మీరు బ్యాంకుకు ఫిర్యాదు చేసినా, మీరు మీ స్నేహితుడికి కార్డ్ ఇచ్చారని బ్యాంకుకు తెలిస్తే, మీ క్లెయిమ్ తిరస్కరణకు గురయ్యే అవకాశం ఉంది. ఎందుకంటే, క్రెడిట్ కార్డ్ నిబంధనల ప్రకారం.. కార్డ్ హోల్డర్ మాత్రమే దాన్ని వాడాలి. ఇంకొకరికి ఇవ్వడం అనేది నిబంధనల ఉల్లంఘన అవుతుంది.
– సురక్షితమైన ప్రత్యామ్నాయాలు
అత్యవసరంగా మీ స్నేహితుడికి డబ్బు అవసరమైతే, క్రెడిట్ కార్డ్ ఇవ్వడం కంటే మీరే నేరుగా డబ్బు ఇవ్వడం మంచిది అని ఆర్థిక నిపుణులు సూచిస్తున్నారు. అలా చేయడం వల్ల మీరు ఎంత డబ్బు ఇస్తున్నారో, దాన్ని ఎలా తిరిగి పొందాలో మీకు ఒక స్పష్టత ఉంటుంది. మీ స్నేహితుడు డబ్బు తిరిగి ఇవ్వకపోయినా అది మీ క్రెడిట్ స్కోర్‌పై ప్రభావం చూపదు. ఒకవేళ మీరు క్రెడిట్ కార్డ్ ఇవ్వాల్సి వస్తే, ఖర్చు చేయడానికి ముందుగానే ఒక లిమిట్ పెట్టుకుని, ఆ లిమిట్‌ను మించకుండా చూసుకోవాలి. ఇంకా, మీ స్నేహితుడు చేసిన ఖర్చులను ఎప్పటికప్పుడు ట్రాక్ చేస్తూ ఉండాలి.
మొత్తానికి, క్రెడిట్ కార్డ్ విషయంలో “మీది మీదే, స్నేహితుడిది స్నేహితుడిదే” అని గుర్తుంచుకోవాలి. చిన్న సాయం అనుకుంటే అది పెద్ద కష్టంలోకి నెట్టే ప్రమాదం ఉంది.
About the Author
