కంటి చూపు లేకుండానే ఎవరెస్ట్ శిఖరాన్ని అధిరోహించిన ఛోంజిన్ అంగ్మో – భారత మహిళా ఘనతకు ప్రపంచం నివాళి!
ప్రపంచంలోనే అత్యంత ఎత్తయిన ఎవరెస్ట్ శిఖరాన్ని అధిరోహించాలన్న కల చాలామందికి ఉంటుంది. కానీ దానికి శారీరక పరిమితులు అడ్డుకావు అని నిరూపించుకుంది హిమాచల్‌ ప్రదేశ్‌ కు చెందిన ఛోంజిన్ అంగ్మో. కంటి చూపు లేకపోయినా, ఆమె ఏవిధమైన భయంకు లోనవకుండా త్రివర్ణ పతాకాన్ని ఎవరెస్ట్ శిఖరంపై రెపరెపలాడించడంలో విజయం సాధించారు.
భారతదేశం నుంచి తొలి మహిళ
ఎవరెస్ట్‌ను కంటి చూపు లేకుండానే అధిరోహించిన తొలి భారతీయ మహిళగా, అలాగే ప్రపంచంలో ఇలాంటి ఘనత సాధించిన ఐదో వ్యక్తిగా అంగ్మో అరుదైన రికార్డు సృష్టించారు. ఇది కేవలం ఆమె వ్యక్తిగత విజయమే కాదు, దేశ గర్వకారణంగా మారింది.
చూపు కోల్పోయినా కలలకే కట్టుబడి
హిమాచల్‌ ప్రదేశ్‌లోని ఇండో-టిబెటన్ సరిహద్దు ప్రాంతానికి చెందిన చంగో అనే మారుమూల గ్రామంలో అంగ్మో జన్మించారు. ఎనిమిదేళ్ల వయసులోనే ఆమె చూపును పూర్తిగా కోల్పోయారు. కానీ ఈ పరిమితి ఆమెను నిలిపివేయలేకపోయింది.
విద్యలో కూడా ఆదర్శంగా
ఢిల్లీ యూనివర్సిటీ పరిధిలోని మిరాండా హౌస్ కళాశాలలో డిగ్రీ, పీజీ పూర్తిచేశారు. ప్రస్తుతం యూనియన్ బ్యాంక్ ఆఫ్ ఇండియాలో కస్టమర్ సర్వీస్ అసోసియేట్‌గా విధులు నిర్వహిస్తున్నారు.
పర్వతారోహణపై చిన్ననాటి కల
ఎత్తయిన పర్వతాలపై పయనం చేయడం తన చిన్ననాటి కల అని చెబుతున్న అంగ్మో, ఎవరెస్ట్‌కు ముందు ఎన్నో పర్వతాలను అధిరోహించారు. అనేక సాహసోపేత కార్యక్రమాల్లో పాల్గొన్నారు. ప్రతి అడుగూ ఆమెకు సవాలే అయినా, ఆమె దృఢ సంకల్పం ఎప్పుడూ అగ్రస్థానంలో నిలిచింది.
ఛోంజిన్ అంగ్మో కథ ఇది – చూపు కోల్పోయినా, ఆశయాన్ని కోల్పోని అసాధారణ సాహసయాత్ర.
About the Author
